Боғча ёши

Болани боғчага қандай тайёрлаш керак?

Боғчага кетишда болалар қўлингизга маҳкам ёпишиб бақирмаслиги, жазавага тушмаслиги учун руҳшунослар ва бундай даврни бошларидан кечирган тажрибали ота-оналарнинг маслаҳатларини ўқишни таклиф қиламиз.

1-қоидаОлдиндан тўғри режимга ўтинг

Фарзандингиз гангиб қолмаслиги учун, сиз уни олдиндан эртароқ ётиш ва эртароқ туришга ўргатишингиз керак. Агар у кундузи ухламасликка одатланган бўлса, сиз болага «осойишталик соати» тўғрисида тушунтиринг.

2-қоидаБоғчанинг ижобий ва салбий томонлари ҳақида айтиб беринг

Боғча ҳақида болага тўғрисини — у ерда ўйинчоқлар ҳам, болалар ҳам кўплигини, бу масалада айрим қийинчиликлар туғилишини айтинг. Ва кимдир уни хафа қилса, осойишталик соатида ҳожатхонага чиққиси келса ва бошқа муаммолар чиқса нима қилиш кераклигини тушунтиринг.

3-қоидаБолани ўз вақтида олинг

Бола боғчага бора бошлагандан кейин уни ҳар доим ўз вақтида олишга ҳаракат қилинг. Агар сиз болани олишга кечикиб борсангиз, у ўзини ташлаб кетилгандек ҳис қилиши мумкин. Чунки бу ҳиссиёт болалар учун энг қўрқинчлиси ҳисобланади.

4-қоидаТарбиячи билан танишинг

Агар сиз тарбиячи билан олдиндан танишсангиз ўзингизга ҳам, фарзандингизга ҳам осонроқ бўлади. Бу аёл сизнинг эркатойингизга қараб туришини, уни овқатлантириши ва кийинтиришини эсингиздан чиқарманг.

5-қоидаКойиманг, аксинча, мақтанг

Кечқурун боғчадан кейин қилган ортиқча инжиқликлари ёки тўполончилиги учун болаларни койиманг. Уларни дадиллиги ва жасурлиги учун мақтанг, боғчада нима воқеалар бўлгани ҳақида тез-тез суриштириб туринг ва умуман — вақтингизни кўпроқ бирга ўтказинг!

Манба: Daryo.uz